Министерот Шапуриќ ја посети новата лабораторија на компанијата БДА

Притоа се запознаа со техничките и стручни можности на лабораторијата, која има 19 методи за испитување.

- Станува збор за една од најсовремените приватни лаборатории во Македонија, по стандардите од 2018 година. Примената на најсовремените технологии и стандарди на ЕУ ќе значи зголемено ниво на контрола на безбедноста на храната и водата. Исто така разговаравме со менаџментот за можностите за подршката коишто се нудат со владините мерки за домашните компании, - изјави министерот Шапуриќ.

Во лабораторијата ќе се испитуваат сите видови на млеко и млечни производи, месо и месни производи, овошје и зеленчук, жито и житни производи, јајца, вода, воздух, сите видови на безалкохолни пијалоци, сокови, зачини, сточна храна, мед и уште голем број на други производи. Акредитацијата се однесува и за одредени бактерии, како и супер анализи доколку постои сомневање во квалитетот на резултатите во било која друга лабораторија.

 Сопственик на компанијата БДА Најден Бајдевски, вели дека е голем интересот на компаниите и приватните лица, кои бараат секаков вид на испитувања.

- За почеток имаме голем број на клиенти. Резултатите од нашата лабораторија се прифатени насекаде во Европа и во светот, бидејќи сме акредитирани по најновите стандарди MKC EN ISO/IEC 17025.Станува збор за професионална лабораторија, која дава високо професионални резултати. Најголем дел од нашата опрема е од Израел и Италија, која не може да даде погрешни резултати, бидејќи станува збор за многу софистицирана опрема, - изјави Бајдевски.

Тој додава дека се во постапка за набавување на нова опрема и планираат да  ги прошират методите за тестирање на храна. Се надева дека наредната година ќе има нови  инвестиции и ќе се зголеми мониторингот на храна и производството на храна.

Компанијата БДА е една од најспешните во Куманово, постои 12 години и се занимава со производство и преработка на месо и месни производи.