Зачленете се во нашиот клуб на читатели и најновите текстови ќе ги добивате на вашата мејл адреса
Општина Старо Нагоричане денеска беше домаќин на Здружение „Коледари“ од Куманово каде што започна прославата на големиот христијански празник Божиќ. Коледарите ги пречека градоначалникот Миодраг Јовановиќ, кој ги одведе гостите до црквата „Св.Ѓорѓи“, и потоа пред општинската зграда приреди забава и богата трпеза.
Чест е што коледарите дојдоа во нашата општина и направивме прекрасно дружење. Гостите имаа можност да го посетат и нашиот бисер, прекрасната црква Св. Ѓорѓи, храмот на православието. Сите заедно треба да ја почитуваме традицијата и да ги продолжиме нашите православни обичаи - рече градоначалникот Јовановиќ.
Кумот Горан Денковиќ се радува што станал кум во општината Старо Нагоричане и им посака многу здравје и успех на сите негови сограѓани.
Коледарите велат дека основната цел кога го формирале здружението била желбата да се сочува традицијата и да ги вратат обичаите кои биле малку подзаборавени.
Секоја работа што се работи континуирано, искрено и од срце ќе биде успешна и ќе трае. Оваа година формиравме и подмладок на Коледарите и се надевам дека тие ќе ја продолжат нашата традиција - рече Мирослав Доневски, претседател на здружението.
Прославата во Старо Нагоричане беше збогатене со играорци и трубачи, како и со традиционално греење на ракија и чај.
Коледарите ќе ги продолжат активностите утре во 10.30 часот во цркавата Св.Никола каде ќе се освети бадниковата погача и гранчињата. Во 12 часот пред Центарот на културата ќе следи културно - уметничка програма, а ќе бидат поделени и бадниковите гранчиња.
И.И.