Близу 12 илјади корисници на социјална заштита ќе користат здравствени услуги без дополнителна потврда

Министерството за социјална политика, демографија и млади ја информираше јавноста за усогласување на системите за социјална со здравствена заштита.

„Досегашните административни бариери се веќе надминати, преку поврзување на системите на социјална и здравствена заштита, односно Министерството за социјална политика, демографија и млади во соработка со Фондот за здравствено осигурување и тоа за вкупно 11.943 корисници на права од системот на социјална заштита“, стои во објавата на министерството.

Ова се однесува на корисници, ослободени од партиципација и тоа: осигурени лица со попреченост, според прописите за детска заштита и социјална заштита, корисниците на гарантирана минимална помош, кои се лица неспособни за работа и корисници на вон-семејна заштита, корисници на надоместок за помош и нега од друго лице кои не се по друга основа здравствено осигурени, корисници на право на социјална сигурност на стари лица и  корисници на право на посебен додаток.

Со ова се унапредуваат правата на сите граѓани во Македонија, со посебен акцент на правата на лица од ранливи категории.