Димитриевски реизбран за претседател на ЗНАМ

Тој најави дека ЗНАМ ќе дејствува како коректор на власта, која, според него, заслужува шанса бидејќи ја добила довербата од граѓаните на изборите.

„ЗНАМ не е ниту ВМРО-ДПМНЕ, а уште помалку СДСМ. ЗНАМ е гласноговорник на народот и коректор на власта. Оваа власт заслужува шанса затоа што граѓаните тоа го одлучија на избори“, изјави Димитриевски.

По неговиот реизбор, тој рече дека партијата презема голема одговорност да создаде нова политичка сила која работи за граѓаните, додавајќи дека нивната идеологија влече корени од Крушевскиот манифест и АСНОМ. Тој вели дека никој нема да избега од одговорност, обвинувајќи дека „волци облечени во јагнешки кожи“ плаќаат медиуми и инфлуенсери за ширење лаги против луѓе од кои се плашат.

ЗНАМ освои шест пратенички места на последните парламентарни избори и има двајца министри во владата на Христијан Мицкоски. Локално партијата е на власт во Куманово, а Димитриевски најави дека ќе се кандидира за трет мандат за градоначалник.