Јасмина Спасовска уште еден мандат ќе раководи со ОУ „Браќа Миладиновци“

Новиот мандат започнува да тече од 12 јуни, откако е поминат законски предвидениот рок за евентуални жалби, а на функцијата останува во наредните 4 години.

„Многу од она што планирав успеав да го остварам, а приоритет во наредниот период ќе ми биде обезбедување на средства за санација на тоалетите и подовите во училиштата. Ќе аплицираме на повици и проекти, ќе се обратиме до министерството или општинските служби, верувам дека ќе најдеме начин да го завршиме и тој проект. Од претходно најмногу сум горда што училишната зграда е целосно подготвена и опремена за инклузивна настава“, истакна директорката Спасовска.

Во училиштето е инсталиран лифт во централната зграда, поставени се тактилни плочи за слабовидни лица, дел од тоалетите се инклузивни и за лица со телесен инвалидитет, на сите влезови постојат пристапни рампи.

Според директорката во првиот мандат целосно е реконструирана и реновирана зградата на улицата Тане Георгиевски, поставена е енергетски ефикасна фасада на нивниот објект во Соколана, реконструирана е училишната зграда на подрачното училиште во Пчиња, а со средства од владата во 2023 година е заменета кровната конструкција и поставен нов кров, истовремено реконструирана е електричната, изолационата и водоводната инсталација на најгорниот кат на централното училиште.   

Деновиве треба да започне поставување на енергетско ефикасна фасада на централната зграда, проект кој ќе се работи со средства на Кралството Шведска и УНДП, кофинансирана од Општина Куманово.