Oдбележaн 80 - годишниот јубилеј на ОУ „Кочо Рацин“

„Училиштето со години наназад ја гради нашата историја, со генерации на ученици, наставници и соработници. Гордо го носи името на Кочо Рацин, кој не е само поет, тој е совеста на еден народ. Опстојува во своите заложби достоиствено да продолжи во процесот на воспитување и образување на нови генерации личности со вистински вредности, кои ќе бидат столб на нашето општество и одговорни градители на иднината“, истакна во поздравниот говор директорката Галаба Давчевска.

 Во музичко- сценскиот настап наречен „Рацинови“ учествуваа повеќе од 300 ученици од сите генерации на училиштето. Преку кратки скечеви, на хумористичен начин  го претставија секојдневниот ученички живот, нивните „маки“, односот кон професорите и меѓусебното дружење. На сцената се пееше и играше на популарни, македонски еверегрин мелодии.

Во подготовка на претставата помогнале актерот Никица Јанковски и кореографката Бојана Кимевска.  

Основното училиште “Кочо Рацин“ e основано како прво училиште на македонски јазик во слободно Куманово, во јануари 1945 година, како Народно основно школо „Св. Климент Охридски“. Било сместено во зградата на денешното ОУ „Крсте Мисирков“, а работело и во зградата на Гимназијата. Во 1983 година е преместено во модерна новоизградена зграда во населбата „Гоце Делчев“.

Во училиштето учат ученици од населбите Гоце Делчев, Зелен Рид, Јане Сандански и селата Проевце, Доброшане и Биљановце, во централното и 7 подрачни училишта.