Дрво падна во Средорек, столб се накриви кај „Макпетрол“

Инцидентот, најверојатно предизвикан од дождот, го попречи сообраќајот и предизвика сообраќаен метеж, бидејќи во тој момент на улицата имаше поголем број возила и пешаци. Дрвото е исушено и оштетено и се наоѓаше покрај коритото на Липковка.  Очевидци велат дека за влакно е избегната трагедија, доколку огромниот трупец паднал на некој од автомобилите или врз граѓаните кои ги имаше во голем број.

Само стотина метри понатаму, на влезот кон бензинската пумпа „Макпетрол“, пред семафорите, е забележан нов сериозен проблем – електричен столб  кој е значително накривен. Испаднеле дел од шрафовите кои го држеле на тротоарот. Доколку столбот целосно падне, може да предизвика материјална штета, а потенцијално е и опасност по безбедноста на граѓаните.

Граѓаните апелираат до надлежните институции итно да интервенираат и да ја обезбедат локацијата пред да дојде до посериозни последици.

"Вечерашното невреме, кое и не беше со некој голем интензитет,  откри колку е дотраена и колку не се одржува инфраструктурата во градот“, коментираат граѓаните  и апелираат за брза реакција на надлежните.