Промоција на романот „Три Марии“ од Оливера Ќорвезироска во Куманово

Промотор на романот  ќе биде Ермис Лафазановски, а извадоци ќе читаат актерките Александра Михајловска Величковски и Нина Максимова.
 
„Три Марии“ е роман што го отвара просторот за размислување за женските искуства, личните и колективните приказни, домот, идентитетот, семејството, како и начините на кои литературата ги преиспитува,обработува, лоцира, стега личните судбини и реалноста во која живееме. 

Романот има добиено три престижни книжевни признанија: „Рациново признание“- за најуспешно книжевно дело,  „Стале Попов“- награда на Друштво на писатели на Македонија за најдобро прозно дело и  „Роман на годината“ за 2025 година, награда што ја доделува Фондацијата „Славко Јаневски“

 На промоцијата, во разговорот за романот и неговите книжевни слоеви, публиката ќе има можност одблизу да се запознае со творечкиот свет на авторката Ќорвезироска.

Оливера Ќорвезироска е родена во Куманово.  Авторка е на романите „Заклученото тело на Лу“ ,  „Аб'т“ и „Три Марии“, како и на повеќе збирки на раскази и поезија, романи и сликовници за деца.

Нејзините дела се преведени на: албански, српски, англиски, француски, турски, чешки, словенечки, полски, руски, унгарски и бугарски јазик.

Промоцијата на книгата е дел од годишната  програма  на Центарот за култура за 2026 година поддржана од Министерство за култура и туризам.