Стојковски: Во Куманово нема основна инфраструктура за лицата со попреченост

Во централното градско подрачје на Куманово нема основна инфраструктура која ги задоволува потребите на лицата со попреченост, поради што е загрозена нивната безбедност и често целосно им е оневозможено движењето.

Ваквата состојба е резултат на долгогодишно лошо менаџирање на локалната власт, која не посветила внимание на оваа категорија граѓани, изјави кандидатот за градоначалник Горан Стојковски – Диро на денешната прес-конференција.

„На Малиот плоштад нема ниту една пропишно поставена рампа за лица со попреченост, а гранитните плочи се нерамни. Иста е состојбата и со катната гаража и Домот на културата. Имаме патека која завршува директно на сообраќајница, без обележан пешачки премин, тротоар кој не е проширен и завршува слепо. Ова покажува колку овој простор е небезбеден и колку лицата со попреченост реално можат да функционираат тука. Истовремено, тоа говори и за лошото менаџирање со проектите од страна на Општина Куманово, иако постојано се зборува дека треба да има инклузивност и еднакви услови за лицата со попреченост “, рече Стојковски.

Тој најави дека, доколку ја добие довербата на граѓаните, една од првите обврски ќе биде целосна ревизија на реализираните проекти, со цел изведувачите да бидат обврзани да ги коригираат пропустите и да ги усогласат со потребите на лицата со попреченост.

Исто така, Стојковски најави и засилен и бескомпромисен надзор при реализацијата на сите идни проекти, за ангажираните фирми да ја извршуваат работата квалитетно и во согласност со стандардите.