Нови „зебри“ на пола улица

Граѓаните  се чудат и прашуваат дали е ова нова мода за обележување на пешачките премини во градот.

„ Во Куманово ова е редовна пракса,  правено- недоправено, оставено на пола, неквалитетно изработено. Што и да е не не` изненадува. Можеле и само да нацртаат попречно линија со стрелки на краевите, ем многу побрзо ќе сработат, ем помалку боја ќе потрошат“, коментира пензионер.

Одржувањето на хоризонталната сигнализација на дел од сообраќајниците во Куманово ги извршува фирмата „ВИА Сигнал“ од Скопје. Таа започнала со пролетното исцртување по целиот потег на булеварот „3 МУБ“, но било прекинато поради временските неприлики.

„Надлежните од фирмата изведувач не информираа дека откако започнале со работа започнал силен дожд, по што морале итно да прекинат. Набргу ќе биде завршен и тој пешачки премин, а и сите планирани по должина на целиот булевар“, објаснуваат од Сектор за комунални работи.