Промената не доаѓа сама – ја носиме ние, порачаа младите од локалниот совет на Крива Паланка

Настанот беше модериран од Емилија Пановска – дел од тимот на Европска куќа – која го водеше разговорот со тројца претставници од Локалниот младински совет на Крива Паланка: Никола Митовски, Сара Стојановска и Анастасија Илиевска.

Во текот на 45-минутната дискусија, присутните имаа можност да слушнат што точно претставува Локален младински совет, како се формира, кои се неговите надлежности, и најважно – како младите може реално да влијаат врз локалните процеси и одлуки. Претставниците споделија конкретни примери од нивното работење, како и предизвиците со кои се соочуваат во нивната мисија да го засилат младинскиот глас.

„Можеби сме мала општина, но тоа не значи дека сме тивки. Напротив – кога младите се организираат, нивната енергија може да донесе вистинска промена,“ истакнаа од Советот.

Во фокусот беше и инклузивноста – прашањето како се вклучуваат млади од различни социјални и економски средини, вклучувајќи ранливи категории. Се отвори и прашањањето за мотивацијата: што ги натерало младите да се вклучат и што би им порачале на нивните врсници кои се двоумат дали да бидат активни.

Настанот заврши со заедничка порака од локален младински совет Крива Паланка: „Не чекајте некој друг да направи промена. Вие можете да бидете таа промена. Вашиот став, идеи и енергија се потребни – ова е можност да се слушне вашето мислење и да се изгради подобро утре за сите нас.“

Иако темата беше од значење за целиот регион, ваков вид разговори не можеа да бидат поткрепени и со искуства од соседните општини – бидејќи во Куманово и Кратово сè уште не се формирани Локални младински совети. Овој факт само го потенцира она што Крива Паланка го демонстрира веќе неколку години: дека младинското учество не е прашање на големина на градот, туку на иницијатива, храброст и желба за ангажман.

А додека некои општини сè уште „се консултираат“, младите од Паланка веќе ги пишуваат следните чекори.

Никола Митовски