Димитриевски и советниците кои го суспендираа ДУП-от лично да ја платат штетата, побараа од СДСМ

„Градоначалникот Димитриевски да одговори на јавноста и на кумановци (како даночни обврзници) како големи средства “пари на граѓаните“ ќе завршат на сметка на приватни инвеститори. И покрај тоа што неговите служби назначени од него го одобриле барањето за градење и изготвиле договор за надомест на Уредување на градежно земјиште, самиот градоначалникот не сакал да го потпише. Сега кога се исцрпени сите правни лекови и механизми по кои градоначалникот можеше да одолговлекува и да се пресметува со неистомислениците и нема веќе простор за глумење жртва бараме да се поднесе одговорност, бидејќи сите инстанци - Министерството за транспорт и врски, Управниот и Уставниот суд даваа мислења и одлучија во иста насока“, истакна советникот Александар Јовановски.

Тој апелираше да се изнајде начин да се издаде одобрение за градба и да престане самоволието на градоначалникот, затоа што во спротивно цената од штетата по основ на камати ќе расне од ден на ден.

„Во минатото го слушавме како само тој го штител јавниот интерес, а сега се претставува како голем патриот па би сакале да го потсетиме дека патриотизам е и почитување на законите и нивно спроведување“, кажа Јовановски.

Тој потсети дека Уставниот суд пред два дена ја укина одлуката за забрана за примена на ДУП-от кај Школска амбуланта, која ја изгласа мнозинството во Советот, а советничката група на СДСМ и коалицијата гласаше против и сугерираше дека е незаконска.

На оваа локација е предвидена изградба на една зграда од 7 ката и неколку објекти од 4 ката, а не 11-катница како што се шпекулираше во јавноста, кажа Јовановски.