„Макраме“ и „Три манастирски цркви“ наградени на фестивалот „Камера 300“ во Битола

Филмот „Макраме“ на Надица Петковиќ, кустос советник етнолог,  ја доби наградата УНИКА, која ја доделува Меѓународната асоцијација за уметнички филм, додека „Три манастирски цркви во Кумановско“ го доби признанието „Златна камера 300“.

Документарниот филм „Макраме“ го обработува традиционалното плетење макраме и неговото културно значење, прикажувајќи го како исклучително визуелно и истражувачко остварување. Проектот е финансиран од Општина Куманово.

Филмот „Три манастирски цркви во Кумановско“, на авторката Валентина Андреиќ – кустос советник, историчар на уметност, претставува длабинска уметничка обработка на духовното и културното наследство на трите манастирски храмови, прикажани преку внимателно избрана визуелна естетика и стручна документарна поставеност. Филмот е финансиран од Министерството за култура и туризам и е дел од годишната програма на Националната установа Музеј Куманово.

Овие две награди го потврдуваат континуираниот раст и висок квалитет на продукцијата на НУ Музеј Куманово, како и значењето на институционалната поддршка за развојот на документарниот филм и промоцијата на националното културно наследство.