Најдобрите наставници и ученици од Крива Паланка добија признание на Денот на просветителите

За најдобар просветен работник во предметна настава беше прогласен професорот по спорт и спортски активности во СОУ „Ѓорче Петров“, Ведран Белешковски, кој пет години во низа со женскиот кошаркарски училишен тим освојува државни првенства, медали од Европски средношколски првенства и достојно ги претставуваат гимназијата и градот на светски гимназиски натпреварувања.

Признание за најдобар просветен работник во одделенска настава доби Јасминка Станковска од ООУ „Илинден“, која со своето мото „Учете ги децата да ги прифаќаат различностите и ќе стекнат самодоверба, преку  иновативен пристап во работата, работи на едукација и развој на младите генерации.

За ученици на генерација се прогласени: Горјан Николовски од ООУ „Св. Јоаким Крчовски“, Марија Ивановска, ООУ „Илинден“ и Ева Симонова, СОУ „Ѓорче Петров“.

Градоначалникот Сашко Митовски ги врачи признанијата, и се обрати на присутните со порака дека силата на словото е најголемо оружје на едно општество.

„Просветителството не е само слава од минатото – тоа е жива искра, обврска и повик. Во време на брзи промени и иновации, образованието останува најсилниот одговор на сите предизвици. Јазикот, писмото и знаењето не се дадени– тие се трајна основа што ние треба да ја негуваме, чуваме и пренесуваме, како што вие ценети  просветни работници, го осветлувате патот на нашите деца. Вашиот труд не се мери во часови работа, туку со срцето и духот  што го вложувате. Вие сте тивки херои на нашето време’, истакна градоначалникот Митовски.

 Акладемијата беше збогатена со културно-забавна програма.