Обуки за информатички вештини во Бирото за вработување во Куманово

Тие се дел од редовниот оперативен план за тековната 2024 година, а заинтересираните ќе можат да се пријавуваат најдоцна до 30 ноември или до конечно пополнување на бројот на предвидени кандидати.

„Обуката за напредни ИТ вештини содржи 14 модули- специјалист за безбедност, клауд администратор, специјалист за вештачка интелигенција, аналитичар, јава девелопер, оперативен специјалист, 3Д уметници итн. Профилите се многу барани на пазарот на труд, најмногу од компаниите во информатичкиот сектор. Обуката нуди можности за вработување и во институциите од јавниот сектор, банките и сите други на кои би им користеле овие вештини. По завршување на обуката се доделува меѓународно признаен сертификат со што посетителите на курсот, стануваат конкурентни и на домашниот и на странскиот пазар. Освен критериумот да не се постари од 40 години, треба да имаат завршено најмалку средно образование“,  објасни раководителката Марија Димитријевска.

Втората мерка е за обезбедување на услуги за вработување во име на работодавачот, односно невработените се обучуваат да најдат таленти и да лоцираат поединци кои ги исполнуваат барањата на работодавачите. Последниве години ова е доста барана професија, особено од поголемите компании кои се соочуваат со сериозен недостаток на квалификувани кадри. Наменета е за високо образовани лица, со најмногу на 40-годишна возраст.

„Сите мерки од оперативниот план се креирани на барање на работодавачите, но и на барање на невработените. Тоа се мерки наменети за директно вработување и мерки наменети за зголемување на степенот на конкурентност. И побарувачката за лица кои поседуваат ИТ вештини е се поголем, а потребни и барани се на пазарот на труд, и на домашниот и пошироко во Европа“, појаснува Димитријевска.

Статистиката покажува дека до крајот на април во Куманово биле регистрирани 10.710 активни баратели на работа.