40 ученици се испишале од кумановските училишта до полугодие, главно се иселиле во други градови во земјата

„Од основните училишта се испишале 38 ученици, од кои 29 поради преселба во друга општина во рамки на државата и 9 поради преселба во друга држава. Во средните училишта, во првото полугодие се испишале 2 ученици поради преселба во друга држава, заклучно со 5 февруари годинава“, соопштија од Секторот за образование при Општина Куманово.

Трендот на иселување од Куманово продолжува и во текот на учебната година, но не со истата динамика како во претходните години. Минатата година, во второто полугодие се испишале 174 ученици, а во учебната 2024/2025 година 130 ученици. За разлика од порано, кога семејствата најчесто заминуваа во странство, оваа година повеќето се преселиле во други градови во Македонија.

Во учебната 2025/2026 година, во средните училишта во Куманово се запишани 1.130 ученици во прва година, а во прво одделение 904 првачиња, што е за 60 помалку во споредба со учебната 2024/2025 година.