Аукција на слики од Гоце Божурски за помош на семејствата во Кочани

Аукцијата ќе се одржи вечерва во „Занаетчиски дом“ во Куманово, со почеток во 19:30 часот, а пред љубителите на уметноста и хуманите граѓани ќе бидат изложени 15 уметнички дела, кои ќе бидат понудени на продажба.

Хуманитарниот настан се реализира со поддршка на „Лајонс“ клубот од Куманово и Фондацијата за култура и спорт при Општина Куманово, а сите собрани средства ќе бидат донирани за помош на семејствата погодени од трагедијата.

Божурски и претходно покажал дека уметноста може да биде силен поттик за солидарност и поддршка. Во текот на својата долгогодишна уметничка кариера, тој во повеќе наврати донирал свои дела за хуманитарни цели и помош на ранливи категории граѓани.

Меѓу позначајните хуманитарни акции е аукцијата на 20 негови слики, кога сите дела биле продадени, а средствата биле наменети за помош на слепи лица и лица со посебни потреби.

Со оваа аукција, Божурски уште еднаш испраќа порака дека уметноста не е само естетика, туку и хуманост, емпатија и подадена рака тогаш кога е најпотребно.