Депонијата „Краста“ сѐ уште чади, Пчињани најавуваат петиција и радикални мерки

Тие синоќа одржаа состанок на кој се договориле во најкус рок да поднесат конкретни барања до локалната и централната власт за трајно решавање на проблемот. Поддршка добиле и од жителите на околните села Студена Бара, Винце, Вакв, Биљановце, Романовце, Бабин Дол, Ново Село и Доброшане, како и од скопските села со кои граничат.

„Нашиот проблем не е политички ниту партиски, туку системски, бидејќи со децении не се решава. Од утре почнуваме со активности на терен и собирање потписи за петиција. Овој проблем мора да се реши. И ние сме граѓани на оваа држава, плаќаме даноци и имаме право на чист воздух, наместо секојдневно труење. Имаме зголемен број млади луѓе и деца заболени од карцином, а зголемена е и смртноста. Сметаме дека сето тоа е последица на загадениот воздух. Тоа повеќе нема да го толерираме. Ќе се организираме и во наредните денови ќе излеземе со конкретни ставови и барања“, велат од Месната заедница на селото Пчиња.

Жителите тврдат дека депонијата гори веќе три месеци, а во последните денови состојбата дополнително ескалирала. Тие стравуваат дека со доаѓањето на летото повторно ќе бидат загрозени нивните имоти, бидејќи пожарот неконтролирано се шири и кон околните ниви.

Тие се прашуваат зошто надлежните служби во Министерството за животна средина, Државниот инспекторат и локалните инспектори не интервенираат и не ја затворат депонијата, како што постапуваат во други градови, кога има ваков проблем.    

Во изминатиот период реагирале до ЈП „Чистота и Зеленило“, од каде што им било кажано дека постапуваат согласно своите можности и дека пожарот го затрупуваат со земја, но дека немаат доволно средства и капацитети за друго решение.

Од Секторот за инспекциски надзор при Општина Куманово, направиле увид на лице место, при што биле констатирано дека јавното претпријатие кое стопанисува со депонијата со земја и вода го гасне пожарот.

Жителите потсетуваат дека депонијата не го загадува само селото Пчиња, туку и целиот регион, поради што ги повикуваат граѓаните на Куманово масовно да ги поддржат и да им се придружат во борбата за конечно решавање на овој долгогодишен проблем.