Граѓаните заслужуваат одговори за измените на ДУП-от и случајот со „Лидл“, вели Ристовски

„На дневен ред на Советот на Општина Куманово повторно се наоѓа точката поврзана со „Лидл“ и спорниот ДУП — случај кој подолг период ја бранува јавноста и отвора сериозни сомнежи за нетранспарентност, судир на интереси и можно незаконско влијание во урбанистичките постапки. СДСМ  потсетува дека уште минатата година јавно предупредувавме на сомнителни урбанистички процеси, на можноста од однапред координирани активности и на опасноста приватни интереси да бидат ставени пред интересите на граѓаните на Куманово. Според јавно објавени информации, парцела поврзана со лица блиски до градоначалникот била купена за 250.000 евра, а само неколку дена подоцна препродадена на „Лидл“ за 600.000 евра, при што бил остварен значителен профит. Овие информации отвораат сериозни прашања кои институциите мора темелно да ги испитаат. СДСМ не е против инвестиции и развој. Напротив — секоја нова инвестиција и секое ново работно место се добредојдени за Куманово. Но, граѓаните имаат право да знаат дали сите постапки биле водени законски, транспарентно и во јавен интерес“, кажа Ристовски.

 Тој додаде дека јавноста заслужува одговори и праша кој имал корист од измените на ДУП-от, дали институциите постапувале независно и транспарентно, дали постоела координација при урбанистичките измени, зошто и понатаму нема целосни и јасни одговори за овој случај и зошто интитуциите молчат?

„Ги повикуваме и советниците во Советот на Општина Куманово да носат одлуки исклучиво во интерес на граѓаните и со целосна одговорност пред јавноста. Куманово заслужува транспарентно, чесно и одговорно управување, засновано на законитост и јавен интерес“, заврши Ристовски.