„Сонцата на Кокино“ освоија две први места на натпреварот „FIRST LEGO LEAGUE“

Во силна конкуренција од околу 30 тима од државата, кумановските натпреварувачи покажаа извонредни резултати и се закитија со две големи признанија.

Младите иноватори триумфираа во категориите за најдобро решение на проблем и најубав штанд, со што го потврдија квалитетот на својата идеја, но и начинот на нејзината презентација пред жири-комисијата и публиката.

„Овој успех е резултат на посветеноста, љубопитноста и тимската работа на учениците. За краток временски период тие покажаа дека можат да размислуваат како вистински инженери и да понудат креативни решенија за реални предизвици“, изјави менторот Александар Димовски.

Тимот го сочинуваат: Алек Краљевски, Ина Пандиловска, Јован Димковски, Кирил Груевски, Петар Деспотовски и Маша Стојановска, кои во изминатиот период интензивно работеа на развој на проект инспириран од археолошкиот локалитет Кокино. Нивното решение комбинира роботика и археологија – ровер за детекција на подземни структури и механизам за безбедно извлекување артефакти, со цел зачувување и подобро разбирање на културното наследство.

„Сонцата на Кокино“ не само што го афирмираат Куманово како средина што негува млади таленти, туку испраќаат и силна порака за важноста од рано вложување во знаење, иновации и креативност. Воедно, преку својот проект тие ја потенцираат и вредноста на Кокино како едно од најзначајните археолошки наоѓалишта во земјава. Кокино, како наша гордост и една од најстарите мегалитски опсерватории во светот, заслужува поголемо внимание и соодветна промоција. Ние се надеваме дека нашето решение ќе придонесе за зголемен интерес кај јавноста и ќе поттикне повеќе посетители да го откријат ова уникатно место и да ја почувствуваат неговата историска и културна вредност“, додава Димовски.

„FIRST LEGO LEAGUE“ е глобална програма што ги поттикнува децата да истражуваат, анализираат и решаваат проблеми преку наука, технологија, инженерство и математика (STEM), а овогодишната тема „Unearthed“ беше фокусирана на истражување на минатото со помош на современи технологии.