Заканувачки смс пораки добил градоначалникот на Куманово

- Во недела наутро ми беа испратени 2 заканувачки пораки. Не знам кои се мотивите, бидејќи лицето не го познавам, ниту знам дали припаѓа на некоја политичка партија. Оставам на истрагата да утврди за што се работи. Не би сакал да ја откривам содржината на пораките, - изјави градоначалникот Димитриевски.

Заканите му ги упатил Д.С.(34) од Куманово, кој во два навратил по телефон му испратил смс пораки со заканувачка содржина за него и неговиот син. Полицијата го привела Д.С., и против него ќе биде поднесена кривична пријава за сторено кривично дело „загрозување на сигурноста“, казниво по член 144 став 3 во врска со став 1 од Кривичниот законик на Република Македонија.

Одземени му се мобилен телефон, безбол палка, четири полиетиленски пакувања со наркотична дрога марихуана и една сим картичка.

Исто така, било утврдено дека Д.С. завчера ги скршил стакла на два штаба на политичката партија СДСМ, лоцирани на улица Илинденска и улица „Тоде Мендол“ во Куманово. Тој е сторител на уште две кривични дела „оштетување туѓи предмети“, казниви по член 243 став 2 од Кривичниот законик на Република Македонија.