ЗНАМ ја претстави програмата „Проглас за достоинствена Македонија“

Од партијата најавија дека ќе се борат против корупцијата во државата и ќе се зaфат со сериозни реформи во судството.

„ЗНАМ ќе ја врати правдата во Македонија, но притоа не ветинг, темелно ќе се отвара секој предмет, ќе се цени и ќе се пресудува од страна на искусни, вредни и умни луѓе кој тоа се огрешил од законот и кој застанал на страна на политиката, а не на граѓанинот“, кажа Димитриевски.

Тој ги критикуваше политичките опоненти, ДУИ за која рече дека повеќе од две децении само ветувала, никогаш не изградила ниту фабрики, ниту метар од коридорот 8, и „околу прст ги врти, и левите и десните“.

„На овие избори катастрофално ќе изгуби раководството на СДСМ, а притоа ВМРО нема да добие, ќе добие ЗНАМ. Исто како на локалните и ќе го повториме сите заедно“, рече Димитриевски.

На митингот беа презентирани дел од проектите, од економија, екологија, земјоделстово, образование, проекти за млади, повисоки плати, подобар стандард, квалитетно здравство. Тие и порачаа дека ова се избори кои одлучуваат за иднината на Македонија, за достоинствена, чесна и прогресивна Македонија и посочија дека доаѓа нова енергија и нови луѓе во политиката кои нудат чесна и посветена работа.