Деновите на српската култура во Куманово завршуваат со хуманитарен концерт на КУД „Српски вез“

Манифестацијата традиционално се организира по повод Денот на ослободувањето на Куманово – 11 Ноември.

„Членовите на „Српски вез“ се потрудија и подготвија богата програма, во која ќе бидат застапени сите секции на друштвото. Ќе има и неколку изненадувања. Важно е да се напомене дека манифестацијата има хуманитарен карактер и сите собрани средства ќе бидат донирани за лекување на Олгица Давидовска, која боледува од прогресивна мултиплекс склероза“, изјави претседателот на КУД „Српски вез“, Далибор Китановиќ.

Манифестацијата е поддржана од Општина Куманово, Управата за соработка со Србите во регионот и дијаспората, како и од Министерството за култура на Србија.