Пролонгирана изградбата на пругата Куманово-Бељаковце

 Таа е прва од трите делници за железничкото поврзување со Бугарија и досега од вкупно проектираните 31 километар, целосно се завршени осум километри.

Завршувањето на изградбата на пругата, што почна во март 2014 година, веќе беше пролонгирана за 18 месеци. Причина за тоа, се проблемите со експропријација на земјиштето, археолошки наоѓалишта, добивањето градежна дозвола. Можно е пролонгирањето да се одрази врз цената на проектот, но засега не се знае дали ќе има намалување или зголемување на цената на проектот, што сега чини 45 милиони евра.

„Без завршување на експропријацијата не може да почнат работите и со изведувачот ќе мораме да бараме нов термин, а гледаме можност 31 декември 2019 да биде датум за пуштање на пругата“, рече директорот на ЈП МЖ Инфраструктура Ирфан Асани.

Само тројца од сопствениците на земјиштето каде што се гради пругата ја прифатиле проценката со експропријацијата која за метар квадратен изнесувала 60 денари, а сите други почнале судски постапки, што го забавиле процесот.

 Веќе се отстрануваат и проблемите со археолошките наоѓалишта на потегот на пругата и е почната нивна конзервација, поради што градежните работи биле прекинувани на четири места од пругата. Работата била забавена и од огромната количина муниција од Првата и Втората светска војна.

Според Асани, за втората делница кон Бугарија, на потегот Бељаковце-Крива Паланка, во должина од 34 километри, градежните работи треба да почнат следното лето.

Железничкото поврзување меѓу Македонија и Бугарија ќе се случи до крај на 2021 година со пробивање на тунелот од 1.600 метри на границата меѓу двете држави, и оти пругата ќе биде целосно функционална во 2023 година.