Работилница за деца за креативно пишување со Петар Андоновски и Фросина Пармаковска

Часот по креативно пишување е осмислен како интерактивна средба меѓу професионални писатели и ученици. 

„Во првиот дел, учениците на краток и интересен начин ќе се запознаат со развојот на македонската проза. Во вториот, креативен дел, еминентните македонски писатели Фросина Пармаковска и Петар Андоновски ќе ги воведат учениците во основите и техниките на микрофикцијата, односно кратката прозна форма. Преку игра и заедничко создавање приказна, писателите ќе започнат со неколку реченици, а учениците ќе имаат можност да ја продолжат приказната со свои идеи, ликови и пресврти“, велат организаторите.

Оттаму додаваат дека целта е учениците да почувствуваат дека пишувањето не е само вештина, туку и игра, истражување и простор за слободно изразување. 

„Преку непосредна комуникација со писателите, тие ќе се охрабрат да ја користат својата имагинација и да откријат дека секој од нив може да има своја приказна што вреди да биде раскажана“, стои во соопштението.

Работилницата започнува во 11.30 часот.