Се најавува уредување на стариот парк, граѓаните не веруваат

„Ќе чистат еден ден и утре ќе ги снема. Поминете да видите дали ќе бидат тука и наредните денови. Ќе ја окосат тревата и толку. Попусто се фалат. Во паркот со години нема клупи, се е уништетно, валкано и запуштено, обраснато во трева и исушено. Пред неколку години беа исечени тополи и од нив требаше да се направат дрвени клупи. Поставија неколку, а другите каде се“, - прашува еден граѓанин.

Акцијата за чистење и уредување на паркот се најави еден ден откако беше назначен новиот в.д. директор на ЈП “Чистота и зеленило“ Даниел Стојчевски.  На прес-конференција излезе раководителката на техничкиот сектор Благица Јовановска, која најави широка акција за уредување на парковите и зеленилото во градот, како и поставување на нова урбана опрема.

„Паркот ќе се чисти три дена целосно, а потоа ќе се пристапи кон поставување на клупи и корпи за смет. Ги повикувам граѓаните да го посетат овој парк, бидејќи е преубаво, воздухот е чист, имаме засадено нови садници. Се надеваме дека ќе поставиме и нови играчки за да можат граѓаните да уживаат во овие жешки денови“, - изјави Јовановска.

 Стариот градски парк зафаќа површина од 2 хектари и најголем е во градот, но наместо уредени тревни површини и цвеќе, со години е запуштен и запустен, оставен да пропаѓа иако се наоѓа преку улица на јавното претпријатие што е задолжено да го одржува.

Јовановска најави и отварање на нови паркови и цветни површини за да, како што рече, овој град заличи на една урбана средина.