×
  • Насловна
  • Вести
  • Регион
  • Македонија
  • Спорт

  • Видео

  • Колумни
  • Интервју

  • По допрен глас
  • Репортажи
  • Ретроспектива

  • Погранична хроника
  • Фото вест - Ваша пошта!

  • Дезинформации
  • ПРОВЕРКА НА ФАКТИ:КОВИД-19
  • Проверка на факти: реформи кон ЕУ

  • Контакт
  • Политика на приватност
  • Импресум
  • Маркетинг стратегија
  • Понуда за рекламирање

  • Fiore

    Кумановецот Христијан Младеновски стигна до ВОГ, очекува интернационална кариера

    31.12.2022 17:14 | Жаклина Цветковска

    Младиот моден дизајнер Христијан Младеновски од Куманово постигна огромен успех откако фотографија со негов модел беше објавена во модната дигитална галерија на светски најпознатиот и култен моден магазин ВОГ (VOGUE).

    Кумановецот Христијан Младеновски стигна до ВОГ, очекува интернационална кариера

    Фотографијата е направена летово во соработка со хрватскиот фотограф Морено Маткович на која е претставена девојка облечена во комбинезон креиран од Младеновски.

    „Модната креација е направена токму за оваа намена како дел од едиторијалот кој го работевме со Маткович во Риека, Хрватска. Инспирацијата за моделот е играта на сенки, една од референците кои секогаш ги користам во мојата работа, поточно границата помеѓу светот на живите и светот на мртвите, во репрезентација на безвременската класична комбинација на црно и бело. Со Маткович се најдовме во сличноста на естетиката и креативни процеси и дојдовме до концепт со ист извор на креативна идеја, од која произлезе и објавената фотографијата во дигиталната галерија на ВОГ. А да се најдете во една од најпрестижните модни збирки навистина е голем успех и потврда дека вашето творештво е ценето и го потврдувате квалитетот“ раскажува Младеновски.

    За младиот моден дизајнер ова е голема награда за неговата работа, но уникатноста на неговите модни колекции веќе ги имаат препознаено и други интернационални модни списанија со кои соработува и на кои се наоѓаат негови модели. Иако е штотуку дипломиран моден дизајнер, Христијан е во модниот свет уште од средношколските денови и зад себе веќе има 6 успешни колекции и многубројни проекти.

    „Секој мој успех само го потврдува мојот сон, иако многу пати сум бил на работ да се откажам. Но, едноставно сфатив дека оваа работата за мене не е само одлука, туку и судбина на која целосно сум и предаден“, вели одлучно Младеновски.

    Како и секој млад креатор, и тој сака да екпсериментира, бара инспиранција во светот и предметите што го опкружуваат , но сигурно и јасно профилира свој стил и препознатливост по екстравагантноста на креациите и фантастичните композиции на модниот израз.

    „Мојата естетика е неконвенционална за нашите простори, но се трудам максимално да ја понудам на пазарот во најдобро можно светло, а често користам и деконструкција која е речиси секогаш присутна во моите колекции. Секогаш сакам да екпериментирам и многупати творам со општествени и емотивни референци“, појаснува Христијан.

    Авангардната модна сцена е дефинитивно негов избор и авторски фокус кој привлекува внимание, подеднакво како и амбиенталноста на нивното претставување, што покажува дека Христијан не е само моден автор, туку и креатор на комплексни едиторијали што го претставуваат како комплетен мајстор на својот занает. Она што привлекува кај него е спојот на авангардниот стил со исконските природни елементи и необичните, секојдневни и обични простори кои ја доловуваат социјалната авторска ангажираност. Или, поинаку кажано, поврзаноста на екстравагантноста со едноставноста, како стил на живеење и размислување, како порака дека и високата мода одлично му прилега на обичниот свет, кој има свој изграден вредносен дискурс.

    „Тоа е мојот концепт. А јас секогаш имам сопствени концепти, приказни, по кои работат фотографите. Тоа е предизвик за мене и нема да застанам додека моето име не одекне на интернационалниот пазар “,самоуверно вели Младеновски.

    На прашањето што е пресудно при креирањето на неговите модели, дали удобноста, префинетоста на материјалите, или атрактивноста и екстравагантноста, Христијан вели дека сите овие модни елементи мора да се присутни во неговата работа. Најголемо задоволство му е да работи со клиенти кои имаат доверба во него. Со моделите за масовна потрошувачка нема големо искуство и не би им се посветил долгорочно, иако и оваа можност не ја исклучува.

    Христијан е првиот од неговото семејство кој се занимава со креативна работа и сам го пробива патот во светот на модата. Иако е длабоко навлезен во авангардниот моден израз, скромноста, трудољубивоста и искреноста се неговите најголеми адути со кои чекори кон целта.

    „Јас сум дете од традиционално рурално семејство кое го следи својот сон и интуиција. Најважно во животот ми е да ја работам мојата работа која безрезервно ја сакам, таа е дефинитивно мојата прва љубов“, одлучен е Христијан.

    Пред новогодишните празници го прашавме и што би им препорачал на граѓаните, што да облечат за да бидат во согласност со празничниот моден стил.

    „Сите ние имаме поприлично индивидуална и различна естетика. Денес со социјалните мрежи ни се достапни сите трендови од модниот календар,но сепак моја препорака е да бидат храбри и смели во секоја комбинација што ќе ја облечат“, порачува модниот дизајнер.

    Христијан не ја планира иднината. Вели дека неговите планови се многу непредвидливи, и дека работи и живее за моментот. Негов став е дека вчера веќе поминало, а утрешниот ден не се знае што носи. Единствено се надева на уште многу модни колекции и интернационална соработка.