Почна реконструкцијата на кровот на спортската сала во Куманово

„Проектот предвидува демонтажа на старата конструкција и поставување на нова. Проектот е вреден 320.000 евра без ДДБ, во кој Општина Куманово има сопствено учество над 10.000 евра, а останатите средства од околу 310.000 евра се обезбедени од програмата на регионален развој на 2020 година на Министерството за локална самоуправа и Бирото за регионален развој“, изјави неодамна Младен Протиќ, директор на СИПР.

Градоначалникот Максим Димитриевски вели дека извадените бакарни плочи ќе се продадат на јавна лицитација, а средствата ќе се употребат за потребите на салата.

Надлежните велат дека за целосна реконструкција на објектот потребни се околу 800.000 евра, а изработката на проектот чинеше 2,2 милиони денари.

Во последните дваесетина години салата се наоѓаше во очајна состојба. Кровот протекуваше, а водата ја оштетуваше внатрешноста на објектот и паркетот, поради што не се одржуваа државни натпревари. Руинирани се и трибините и  тоалетите.

Владата минатата година ја врати салата на Општината и најави помош за нејзина реконструкција.

Спортската сала во Куманово е изградена 1980 година и има капацитет од 4.150 седишта. Проектирана е од архитектите Трајко Димитров и Живко Гелевски во 1979 година, а ја добила големата награда на Биеналето на Македонската архитектура (БИМАС) во 1981 година.

Таа е најголемиот затворен спортски објект во Куманово, каде се одржуваат кошаркарски, ракометни, футсал, одбојкарски и боксерски натпревари. За салате се врзуваат најголемите спортски достигнувања на кумановските клубови.