Припадниците на израелската религиозна група заминуваат од Куманово

Присуството на триесетина членови на групата предизвика лавина на реакции и говор на омраза на социјалните мрежи, поединци дури се закануваа дека ќе ја преземат работата во свои раце доколку надлежните институции не ги протераат, бидејќи сметаат дека е загрозена безбедноста на нивните деца.  Тоа ја наелектризира состојбата и ја доведе во прашање безбедноста на верниците.

Од љубопитство или во знак на револт повеќе граѓани синоќа ја окупираа улицата и фрлаа камења и упатуваа навреди кон странците, поради што во текот на ноќта полицијата постојано била во близина куќата со цел да не дојде до инцидент .

Странските државјани, семејства со деца се сместени во две приватни куќи, кои ги закупиле во населбата. Во групата има американски, канадски, белгиски и граѓани од Јужна Америка, кои имаат легални патни исправи односно документи и имаат одобрен престој во Северна Македонија. 

Еврејските верници најверојатно припаѓаат на ортодоксната верска група „Лев Тахор“, која се противи на државното уредување и живеат по свои правила. Ваква група до минатата недела престојувала во Сараево, Босна и Херцеговина, па според тамошните медиуми, не ѝ било дозволено да го продолжи престојот, па дошла во Македонија.