Кривопаланечка скулпторка дел од светската уметничка сцена во Пекинг

На изложбата, чија тема е „Соживот“, се прикажани околу 600 современи уметнички дела од речиси 120 земји и региони од светот.

Скулпторката Јанковска се претстави со делото „Метаверзум конекција“, скулптура изработена од отпадни материјали. Како основа и конструкција е користен метал, додека останатите елементи се од пластика и видеоленти (полипропилен), кабли и други делови од електронската технологија.

„Ова дело претставува хармонична коегзистенција меѓу човекот и технологијата. Заедничкиот просперитет на односот човек–машина станува сè поголем предизвик со кој нашата колективна мудрост мора да се соочи денес. Во своите скулптури Јанковска најчесто користи пластика, видеоленти и разни најдени предмети, претежно отпадни материјали од гума и пластика, производи на масовната култура, технологијата и потрошувачкото општество. Со нив таа укажува на светот во кој живееме – преполн со информации, отпад и краткотрајни вредности“, велат од ЛУ Градски музеј Крива Паланка.

Изложените дела не опфаќаат само традиционални уметнички форми како сликарството и скулптурата, туку ги вклучуваат и дигиталната уметност и видеото. Целта на настанот е да се истражат нови концепти во уметничкото творештво, да се стимулира креативноста на уметниците и да се зајакне меѓународното влијание и дискурзивната моќ на современата кинеска уметност.

Организацијата и логистичката поддршка за гостувањето на делото на Јанковска беа реализирани со стручна помош од Ѓорѓи Костовски, кустос-историчар во ЛУ Градски музеј Крива Паланка.

Нела Јанковска е родена во 1971 година во Крива Паланка. Дипломирала на Факултетот за ликовни уметности во Скопје во 1994 година, во класата на професорот Стефан Маневски. Од 1995 година е редовен член на ДЛУМ. Зад себе има повеќе од 30 години активно творештво и учество на бројни групни изложби, ликовни колонии, како и неколку самостојни изложби. Добитник е на наградата за скулптура „Стефан Маневски“ на Сојузот на ликовни педагози на Македонија (2005), наградата на ДЛУМ „Јордан Грабул“ (2008) и годишната награда за скулптура на ДЛУМ за 2023 година, за делото „Метаверзум – средба“, кое обработува концепти на виртуелни и проширени универзуми, комуникација меѓу светови и хуманоидни форми.