Во Љубодраг селскиот водовод запуштен, бунарите загадени

Додека селскиот водовод пропаѓа тие се приморани вода за пиење да носат од градскиот водовод, а бунарската вода да ја користат исклучиво како техничка.

Состојбата е катастрофална, кај мене водата во бунарот е загадена и хемиски и бактериолошки. Не пиеме од неа, туку носам во балончиња од градот. Водата од бунарот ја користиме за перење.- вели Мирко Цветковски.

Селскиот водовод не функционира бидејќи жителите неможат да се договорат за негово одржување. Неколку години се обидувале да се организираат и да го пуштат во употреба, но безуспешно.

Над 50 одсто од луѓето во селото не му плаќаа на човекот кој беше одговорен да ја одржува мрежата и да ја испитува водата. Поради тоа тој не прифаќа повеќе да работи, а и пумпите останаа во дефект. Водоводот е професионално изграден и убаво направено а ние како граѓани многу изгубивме што не работи.- вели  Звонко Цветановски.

Водоводната мрежа, резервоар и два поголеми бунари сега се оставени да пропаѓаат. Жителите бараат јавното претпријатие „Водовод„ да ги преземе и да се грижи за квалитетот на водата.

Од „Водовод„ велат дека селските водоводи се градени самоиницијативно, без никакви стандарди и потребни се многу средства за нивна ревитализација. Потребна е помош од општината и државата за да се реши проблемот во спротивно нема можност да се интервенира.