Во недела по 15-ти пат ќе се одржат Бајловски средби

Манифестацијата традиционално се организира во првата недела по големиот христијански празник Крстовден, денот на осветување на селската црква „Св. Димитрија“. 

Манифестацијата ќе започне во 11 часот, откако ќе заврши неделната литургија, со културно-уметничка програма, настап на ученици од подрачното училиште во с.Бајловце, КУД „Ѓоко Симоновски“ од Здружението на пензионери Куманово, КУД „Срма“ и неколку пејачи.

„Освен што ќе бидат поставени бајловските баници, во 14 часот ќе биде послужен бајловскиот грав за сите присутни. Досега имаме пријавено заинтересирани лица за организиран превоз, околу 100 души, но повеќето посетители доаѓаат со приватни возила. Традиционално на манифестацијата присуствуваат луѓе кои потекнуваат од овој крај, но и други гости од регионот“, изјави Зоран Бојковски од Здружението „Козјачија во срцето“.

Превоз на заинтересираните посетилети ќе има преку туристичката агенција Јоцо Турс, а повратниот билет чини 300 ден.

Бајловските средби се одржуваат под покровителство на градоначалникот и Советот на Општина Старо Нагоричане. Дел од финансиските средства се собрани и од спонзорства на приватни фирми.