10 членови на кризниот штаб и 21 здравствен работник се меѓу 43 новозаболени од коронавирус во Куманово

Според директорот Ариф Љатифи, 10 од заразените се членови на Општинскиот кризен штаб меѓу кои и градоначалникот Максим Димитриевски, а 21 се здравствени работници.

- 19 новозаболени се од Кумановската болница, по еден од Здравствениот дом и од приватна ординација. Меѓу заболените има петмина лекари. Зголемениот број на позитивни случаи е резултат на големиот број на тестирани групи, кои имаат повеќе контакти, - изјави Љатифи.

Тој вели дека во Куманово се дефинирани и идентификувани 12 кластери на заразата и дека состојбата е под контрола и покрај големиот број на новозаболени.

Во Кумановската болница бројот на потврдени од КОВИД-19 се искачи на 73.

Во Куманово  досега се заболени 305 лица.