Зачленете се во нашиот клуб на читатели и најновите текстови ќе ги добивате на вашата мејл адреса
Асоцијацијата за демократски развој на Ромите „Сонце“ - Тетово во соработка со Општина Куманово, вчера подели таблети-компјутери со 10 ГБ интернет, на 30 ученици од ООУ „Христијан Карпош“, кои доаѓаат од сиромашни семејства.
Оваа донација е наменета за учениците кои останаа надвор од образовниот процес, заради недостаток на дигитални уреди во второто полугодие од учебната година. Според директорката Лидија Костиќ, со проектот се опфатени дечиња од ромската заедница, од прво, второ и шесто одделение по избор на невладината организација.
„Децата коишто добија таблети и интеренет во текот на август со своите учителки ќе надокнадат дел од пропуштеното градиво, а од септември ќе продолжат редовно да ја следат наставата. Имаме најава дека во август ќе добиеме уште една помош во таблети и се надевам дека тогаш ќе бидат опфатени деца и од другите заедници, кои потекнуваат од семејства со слаб матерјален статус“, - вели Костиќ.
Донацијата на учениците за следење на настава од далечина е остварена преку проектот “Подобрување на средината за учење на учениците во основно образование”. Во училиштето при врачување на донацијата присуствуваа претставници од Општината и директорот на ромскиот едукативен фонд Реџеп Али Чупи.
Покрај Куманово со проектот се опфатени и општините: Кичево, Кочани, Берово, Битола, Прилеп, Штип, Виница и Делчево.