Амбасадорката на Холандија во посета на Транзитниот центар Табановце

Амбасадорката на Кралството Холандија, Узлем Џанел, го посети Транзитниот центар за мигранти во Табановце, Општина Куманово. 

На средбата присуствувале и директорот на Центарот за управување со кризи, Мухамед Али, и раководителот на Секторот за операции и координација, Горан Стојановски.

Главна тема на разговор било функционирањето на националниот систем за одговор во услови на кризни состојби, особено во ситуации поврзани со миграциските движења.

Се разговарало за подобрување на институционалната координација, комуникацијата меѓу надлежните служби и грижата за мигрантите, со акцент на почитување на меѓународните договори и протоколи.

„Институциите остануваат целосно посветени на исполнување на задачите што произлегуваат од потребите за одговор, превенција и справување со сите ризици што можат да го загрозат животот, здравјето и безбедноста на граѓаните,“ изјави директорот Али.

Амбасадорката Џанел ја истакна континуираната поддршка што Холандија ѝ ја дава на Македонија и ја нагласи подготвеноста за понатамошна соработка во справувањето со кризни и миграциски ситуации.