Гордана Сиљановска - Давкова победи на претседателските избори

Таа освои 560.170 гласови, односно 65,14%, додека актуелниот претседател Стево Пендаровски доби поддршка од 251.541 избирач (29,25%).

Во своето обраќање по победата, кажа дека е среќна што ќе биде прва жена претседател на државата и ќе даде сè од себе да ги брани националните интереси.

„Ќе се опкружам со силни жени околу мене. Не се согласувам дека гласовите сум ги добила со набој на национализам, а тоа ќе го докажам што во мојот кабинет ќе вклучам и Албанци, Турци и други националности“, рече Сиљановска-Давкова.

Професорката Гордана Силјановска - Давкова има 71 година, актуелен пратеник е на ВМРО-ДПМНЕ во Собранието. Беше министерка без ресор во првата влада на Бранко Црвенковски (1992-1994).  

Во предизборното претставување истакнуваше дека претседателот треба да се однесува натпартиски, да не заборави дека е таму заради државните и националните интереси, а не заради своја кариера и слава. Едно од ветувањата што ги даде е дека ќе ги помилува осудените за 27 април, затоа што квалификацијата на делото не одговарало на степенот на насилството.  Вети и враќање на народните канцеларии преку кои секогаш ќе биде блиску до граѓаните. 

Кандидатот на СДСМ Стево Пендаровски, на прес конференција го призна изборниот пораз, честитајќи и на Силјановска и посакувајќи и успешна работа во наредните пет години.

„Мојот концепт за мултиетничка Македонија, целосно интегрирана во евроатлантските структури, денеска за жал не доби мнозинска поддршка од граѓаните. Меѓутоа јас сум длабоко убеден дека само таква Македонија може да биде просперитетна и демократска држава. Во таа смисла, мојата совест е мирна“, изјави Пендаровски во своето обраќање.