Ќе се субвенционира набавка на 200 електрични возила за таксистите, најави Меџити

Меџити рече дека овој проект е дел од стратегијата за борба против загадувањето на воздухот и поефикасен урбан транспорт за граѓаните на Скопје и целата држава.

„Возилото што денес го претставуваме е електрично, со високи еколошки стандарди, без штетни емисии, без бучава и со висока енергетска ефикасност“, рече Меџити и додаде дека овие возила во неколку фази ќе ги заменат постојните кои користат дизел, бензин или гас.

Тој кажа дека просечната цена на едно електрично возило е 28.000 евра, вкупната сума за 200 возила изнесува околу 5,6 милиони евра, а Министерството ќе субвенционира 15% од сумата или околу 840.000 евра. 

Министерството веќе иницирало систем за споделување возила (car sharing system) со првите 100 електрични возила за јавна употреба, електрични тротинети и велосипеди во неколку градови, а во соработка со Европската Унија преку програмата „ЕУ за чист воздух“ донирани се 6 електрични автобуси за Град Скопје, зголемени се капацитетите за мониторинг на квалитетот на воздухот и засадени се десетици илјади садници низ целата земја.