Литературна вечер со Никола Маџиров во Центарот за култура во Куманово

Книжевниот портрет на авторот ќе го презентира писателката и поетеса Оливера Ќорвезироска.

Маџиров е добитник на меѓународната награда за поезијата „Н.К.Казер“ , која ја доделува „Литератур Лана“ во Јужен Тирол, Италија на секои две години, а ќе му биде врачена на почетокот на јуни. Тој е 19-от добитник во 40 годишната историја на ова престижно признание.

„Маџиров спаѓа во највпечатливите гласови на Европа. Тој е ретко кревок во својата радикалност. Постојано ги разнишува утврдените нешта, ја руши историјата и ги преминува сегашноста и минатото според законите на сеќавањето, кое неуморно талка низ времињата“, стои во образложението на наградата.

Тој е добитник и на европскаta награда за млад поет „Хуберт Бурда“, во 2011 година ја добива светската награда за книжевност „ДЈС“ во Кина и европската награда „Левир литерер“ во Франција. Во 2016 година добил наградата за придонес во современата европска поезија на колеџот  „Кингс“ во Кембриџ.

Никола Маџиров е роден во Струмица, во 1973 година. Се работи за истакнат македонски автор, поет, есеист и преведувач, со плодоно творечко богатство, преведено и на најретките јазици во светот, како персиски,хебрејски келтски, каталонски.

Маџиров е автор на збирките поезија „Заклучени во градот“, „Некаде никаде“, „Асфалт, но небо“, „Во градот, некаде“, „Преместен камен“, „Рокчето“ (сликовница за деца- 2023 година) и „Дом во тишина“.