Локалната самоуправа не беше организатор на пресот во Куманово, туку Владата, велат од Општината

-  Локалната самоуправа заедно со Општинскиот штаб за заштита и спасување учествуваше во техничка поддршка и ги спроведуваше дадените насоки за дезинфекција на просторот, бината и микрофоните и дополнително обезбеди заштитни маски и ракавици за сите присутни. Камерите беа позицирани на безбедно растојание од говорниците според укажувањата и препораките за полесно и побрзо справување со пандемијата од КОВИД-19, со молба да се држи растојание и да се носи зашитната опрема која заедно со средствата за дезинфекција беше дадена на секој присутен од страна на Општинскиот штаб пред влезот во салата, - соопштуваат од Општината.

Од таму додаваат дека досега сите прес конференции и терeнски изјави на градоначалникот Максим Димитриевски биле во согласност со препораките за држење дистанца од 2 метри.

- Искрено жалиме за овој настан, чекинг тестирањето е направено по втор пат на 37 лица по барање на епидемиолог. Сите претставници на институциите се тестирани и запознаени со тоа, жалиме што во тој момент а и до ден денеска не постои прецизен правилник и насока која ја дефинира оваа постапка. Потребно е почитување на препораките и прецизно дефинирање на сите процедури за да се избегнат вакви пропусти во иднина. ОШЗС и кабинетот постапуваше согласно одлуките на повисоките државни органи и законските овластувања и така и ќе продoлжиме. Доколку имавме навремено информирање за резултатите како во случајов, пет дена од тестирањето немаше да дојде до ваков пропуст. Посакуваме брзо закрепнување на заболените и ставање на крај на епидемијата, - додаваат од Општина.

На прес-конференцијата којашто се одржа во средата во ходникот на зградата на поранешен Комитет, пред почетокот на Општинскиот кризен штаб, покрај градоначалникот Максим Димитриевски дојдоа и премиерот Оливер Спасовски и тројцата министри Бујар Османи, Венко Филипче и Арбр Адеми, присуствува и дваесетина новинари, камермани и фоторепортери, а следниот ден Димитриевски објави дека е заразен со коронавирус.