Маалска прослава на Водици на Нагорички сокак

Како што налага традицијата, тие се собраа пред кафеаната „Кобра“ и со греана ракија, пивтии и музика го одбележаа празникот. Кум на годинашната прослава е Јовица Стојановиќ.

„Овој ден е голем за сите православни верници и затоа сакаме на посебен начин да го одбележиме – да се видиме и да се дружиме со соседите и со сите добронамерници кои ќе ни се придружат. Прославата ќе ја збогатат и играорците од КУД ‘Срма’, кои ќе ни го разубават денот и ќе нè развеселат“, вели Стојановиќ.

Договорот за организирање маалска прослава на Водици бил постигнат пред осум години, со цел да се продолжи традицијата која некогаш постоела во ова маало.

„Сакаме организацијата постепено да ја пренесеме на младите, повеќе да се вклучат и да ни се придружат. Има интерес и младите, исто како и соседите и минувачите“, вели Гоце Илиќ, минатогодишен кум.

Прославата ја организираат 15 сограѓани, кои секоја година избираат кум – оној кому ќе му се падне паричката од лепчето. Со сопствени средства и со помош на спонзори го обезбедуваат сето неопходно за одбележување на празникот.

Прославата трае до попладневните часови со оро и песна, во духот на заедништвото и православната традиција, со желба ваквото дружење да продолжи и во наредните години, како симбол на маалската слога и почит кон обичаите.