Министерот Исмаили престојуваше во работна посета на Куманово

Заедно со директорот Богдан Таневски, ја посети Куќата музеј на народниот херој Христијан Тодоровски-Карпош и Коџа Мехмед Беј џамијата, во селото Табановце.

„Во својство на министер за култура за првпат сум во Куманово и морам да истакнам дека навистина сум импресиониран од сѐ она што досега го видов, иако тоа е само еден дел од богатото културно наследство на Куманово“ – истакна министерот за култура Исмаили.

Годинава Музејот од Куманово ја започна реализацијата на проектот за реновирање на објектот.

„По завршувањето на сите активности, планирана е и изработка на нова постојана поставка со која преку фотографии, документи, изданија, предмети, оружје, уметнички фотографии и филм за Карпош, посетителите ќе може да се запознаат со ликот и делото на народниот херој“, додаде министерот.

Претходно, министерот се сретна со градоначалникот Максим Димитриевски, а ја разгледа и постојаната музејска поставка во чии рамки се поставени експонати од археолошкото, историското и етнолошкото одделение.