Зачленете се во нашиот клуб на читатели и најновите текстови ќе ги добивате на вашата мејл адреса
Сопственичката на фризерското студио „Нате“ од Куманово, Наташа Додевска, освои две награди на 23-от Меѓународен фестивал на фризури и коса, во Софија, Бугарија.
Наградите се доделени за најдобро изработени невестинска и вечерна фризура. Во силна конкуренција на натпреварувачи од Бугарија, Италија, Русија, Либан, Сирија и други земји, фризурите на Наташа освоиа најголем број на бодови од стручното жири.
- По вторпат учествувам на ова натпреварување. Бев единствена претставничка од Македонија и успеав да постигнам значаен успех. Секогаш ми е предизвик да се натпреварувам со колеги од другите земји и да научам нешто ново, па така во овие услови се организирав и заминав во Бугарија. Наградите се потврда за мојот квалитет во работењето како фризер и како стилист и тие ќе ме мотивираат да работам уште попрофесионално и посветено. Овој викенд за мене е особено среќен, бидејќи и мојот син Јован освои медал на детскиот турнир Зелен тенис во Неготино,- изјави Додевска.
Фризерско студио „Нате“ работи веќе 20 години, и препознатливо е по уникатниот начин на работа и креативноста во изработка на фризури. Додевска досега има учествувано на повеќе меѓународни натпреварувања, а освои награди во Скопје, Подгорица, а ова е втора награда на фестивалот во Софија.