Нема заинтересирани за добивање на субвенции за уредување на дворовите пред стамбените згради во Куманово

Во јавниот повик кој е објавен пред четири месеци беше наведено дека секое поединечно барање може да добие до 80 илјади денари и дека тоа ќе изнесува до 80% од потребната сума за урбано уредување на околината на колективните стамбени објекти.

„Одржавме неколку состаноци на кои управителите на зградите ги запознавме со овој проект и условите кои треба да ги исполнат за да добијат субвенција, парични средства од општината за да се хуманизира и оплемени просторот околу зградите во градот. Но, не покажаа никаков интерес за овој проект, а причините зошто не ми се познати“, изјави Лидија Ланг Спасовска, раководителка на секторот.

Повикот беше објавен кон крајот на март, а замислата е да се помогне и да се иницираат жителите самите, по сопствени потреби, желби и знаења да си го средат просторот во кој би се разладувале во вечерните часови .Сликата за околината на зградите би била поубава и попривлечна, па и Куманово би заличило на средено и урбано место за живеење.

За одржување на веќе средениот двор би биле задолжени самите станари.

„Затоа и сумата покрива 80 проценти, сметавме дека доколку станарите и самите вложат некој денар поодговорно ќе се однесуваат кон цвеќињата, зелените површини и клупите доколку би ги поставиле. Првично вложениот труд не би дозволиле да пропадне, па ќе се погрижат и за наводнување, кастрење, косење- се она што подразбира работа во дворот.А со повеќе раце се вложува помалку труд и побрзо се завршуваат обврските.За жал,граѓаните не се заинетерсирани“, истакнува Ланг Спасовска.

Секторот за комунални работи смета дека направил многу во поглед на информирањето на јавноста: јавниот повик беше објавен во локалните медиуми, за целото време од неполни 5 месеци информацијата е достапна на официјалниот општински сајт а и одговорните лица-стамбени домари се информирани и целосно упатени по ова прашање. 

Општина Куманово одвои 400 илјади денари за уредување на дворните површини околу стамбените згради и годинава за прв пат беше предвидена имплеметација на еден ваков потфат. Јавниот повик е отворен до 30 ноември, но се чини дека сите предвидени средства ќе бидат пренаменети за други комунални потреби на градот.