Нови спортски комплекси и игралишта во сите делови на градот, најави Филиповски

„Ќе се вложи во нови спортско-рекреативни комплекси и модерни игралишта во сите делови на градот. Велосипедски и трим-патеки, street workout зони и адреналински парк за младите. Проширување на програмите за стипендии и награди за талентирани спортисти и ученици.Услови за спорт и рекреација во секое училиште, со функционални сали, уредени дворови и училници на отворено“, кажа Филиповски.

Тој, потенцираше дека целосно ќе се реконструира Соколана - проект кој веќе е во тек. Ќе се постави и нов систем за греење и ладење за Спортската сала, ќе се реконструира спортскиот комплекс во поранешниот Дом на АРМ со мултифункционално игралиште, опрема и трибини. Дополнително,  планирана е  обнова и доопремување на спортските сали во повеќе училишта во градот и околните места што и припаѓаат на општината.  Нашата заложба, нагласи Филиповски, е спортот да биде достапен за сите - за децата, за младите, за професионалците и за постарите генерации. Спортот обединува, гради тимски дух и нè учи на фер игра.

Филиповски потсети на проектите кои се релизирани во изминатите осум години, како што е реконструкцијата на спортската сала, која сега има професионален под по ФИБА стандарди, модерно озвучување, осветлување, семафори и нови реквизити. Додаде дека се изградени и обновени спортски игралишта во повеќе населби, создадени се услови за стотици деца и млади за секојдневно да тренираат, да се развиваат и да растат во здраво опкружување. Поддржани се повеќе од педесет спортски клубови, организирани се стотици спортски настани.