Опозицијата против предлогот на Општината за подигање кредит од милион евра

Координаторот на советничката група на коалицијата на ВМРО-ДПМНЕ Драган Петковски, рече дека е неспорно тоа што јавните претпријатија имаат дотраена и амортизирана механизација и поради тоа имаат проблеми во секојдневното работење, но тој смета дека избраниот модел и моментот на задолжување не е соодветен.

„Сите знаеме во каква кризна состојба се наоѓаме, која се менува од ден на ден. Неблагодарно е да прогнозираме што ќе се случи утре или по една недела, а не по неколку години. Затоа мислам дека во овој моменет да се врши задолжување со рок на враќање од десетина години е во најмала рака ризично и непромислено“, изјави Петковски.

Тој потсети дека до пред кратко време Општината беше заглавена со кредит од програмата МЕАП, поради што општинската сметка беше блокирана повеќе од 10 години и беа исплатени големи камати на сметка на проекти за развојот на градот.

„Треба да земеме кредит кој ќе го потрошиме сега, а треба да го враќаат некои други, кои ќе дојдат после нас. Не знам колку е паметно и домаќински. Затоа ќе гласам против ваквото задолжување“, рече Петковски.

 Со слични аргументи против предлогот се изјаснија и советниците Зоран Петрушевски, Анета Шандева и Осама Мујадини.

Предлог за задолжување на Општината денеска е на разгледување пред Советот како единствена точка на дневен ред.