Освоив гласови колку сите други шест кандидати заедно, изјави Димитриевски

Кандидатот за градоначалник на Куманово од ЗНАМ, Максим Димитриевски, синоќа изјави дека освоил гласови колку сите останати кандидати заедно. 

 Изборите ги оцени како фер и демократски, односно „одржани по скандинавски модел“.

„Јас како кандидат водам убедливо во однос на сите останати шест кандидати, или за споредба – колку што имаат вкупно гласови сите останати кандидати, толку јас, како кандидат на ЗНАМ со поддршка на ВМРО-ДПМНЕ, имам освоено. Дали ќе има втор круг или не, во овој момент не можам да кажам, бидејќи сите податоци сè уште не се обработени. Но и да има втор круг, ЗНАМ дефинитивно ќе биде победник на претстојните локални избори, бидејќи повеќе од јасна е желбата на граѓаните, кои препознаваат континуитет и развој на овој град и сакаат Куманово да продолжи да се развива во тој дух“, изјави Димитриевски.

Тој додаде дека листата на кандидати за советници на ЗНАМ во општина Куманово извојувала победа и добила најголем број гласови.

„Веднаш зад нас е листата на ВМРО-ДПМНЕ, и повеќе од јасно е дека мнозинството во Советот ќе го сочинуваат овие две листи, како и веројатно дел од поранешните партнери во локалната власт“, рече Димитриевски.

Соработниците, членовите и симпатизерите на ЗНАМ победата ја прославија на градскиот плоштад со оро и песна.