Зачленете се во нашиот клуб на читатели и најновите текстови ќе ги добивате на вашата мејл адреса
Во изложбениот салон на Центарот за култура „Трајко Прокопиев“ денеска беше отворена изложбата на слики од ликовната колонија –„Неготино 2020“. Кумановскта публика ќе има можност да види триесетина дела масло на платно на автори од Македонија и Србија, кои минатата година творела во манастирскиот комплекс „Свети Ѓорѓи“.
Организатор на колонијата е Општинската установа Музеј на град Неготино, а изложбата ја отвори директорката Драгица Чекоровска, која вели дека преку оваа изложба граѓаните на Куманово ќе имаат можност да ги запознаат спецификите и карактеристиките на неготинското поднебје, бидејќи авторите преку делата го претставуваат нивниот локален идентитет.
„Целта на ликовната колонија е поттикнување на уметничката продуктивност, создавање на нови ликовни дела, поврзување на уметниците од овој регион, збогатувањето на културната понуда, афирмирањето на современата уметност, како и зголемувањето на колекцијата на уметничките дела во збирката на Музеј на Неготино. Запознавањето на ликовните уметници со регионот во неготинско поднебје, познато многу по винарскиот крај, со посета на винарии и запознавање со културното наследство, се важни содржини на оваа ликовна колонија“, истакна Чекоровска, која се заблагодари на поддршката од Центарот за култура да се презентираат во Куманово.
Изложбата ќе биде отворена до 26 мај.