Отворена изложбата „Кумановска ликовна сцена“

Целта на оваа изложба, на која беа претставени триесетина дела, е правење на еден поширок преглед на историјата на кумановската ликовна уметност и презентација на што поголем број на значајни автори кои живееле и твореле на ова тло, творци вредни за паметење.

„Вечерва можете да видите дела кои се постари од седумдесет години, кои се залог на времето, а со тоа да погледнете каков бил тогашниот ликовен израз, каква им била палетата на првите двајца ликовни уметници кои ги поставиле темелите на кумановската ликовна уметност. Зборувајќи за Трајко Муфтински и Кирил Караџа зборуваме за образовани ликовни творци кои се дообразувале по патувања на светски ликовни центри: Париз, Данска и Италија, кои тогашните поуки ги донеле овде во Куманово, но извршиле влијание и го дале својот придонес за развојот на македонската современа уметност. А таму високо на пиедесталот се наоѓа и доајенот на современото сликарствои Трајче Јанчевски, но и многу други значајни уметници“,- рече на отворањето Драгана Спасовска, историчар на уметноста.

На изложбата беа поставени и најновните ликовни визуелизации кои ја генерираат новата ликовна состојба , со поинаков сензибилитет актуелен во европските и светските ликовни центри, а тоа уште еднаш потврдува дека Куманово е современ ликовен центар, значаен дел од македонската и светската ликовна сцена.

На изложбата беа застапени авторите: Трајче Јанчевски, Александар Симоновиќ, Гоце Божурски, Драгутин Аврамовски Гуте, Часлав Марковиќ, Тања Соларска Темелковски, Момчило Петровски-Моцо, Тане Атанасовски Гарски, Владимир Величковски, Исени Реџаи, Верољуб Станковиќ, Борис Кукуњавски, Зоран Јакимовски, Трајко Тошевски, Мирослава Цветковиќ, Слободан Тимчевски, Марина Цветановска Мартиновска, Синиша Кашавелски, Мухамедали Алил и Страхил Петровски.

Повод за изложбата „Кумановска ликовна сцена“ е овогодинешното честување на јубијелот 500 години постоење на градот, како и 55 години од формирање на НУ Музеј во Куманово.