Паднал од орев и се наденал на шипка

 Живојин Станојковиќ (73) од населбата „Карпош„ викендов го загубил животот кога паднал од дрво и се наденал на метална шипка од ограда. Несреќата се случила во саботата во 13.15 часот, додека Живојин берел ореви во дворот на брат му на улицата 100 број 57. Качен на дрво на висoчина од 5-6 метри, тој со стап ги буткал оревите, при што изгубил рамнотежа и паднал. Несреќниот човек удрил со стомакот на шипката, која го пробола и му нанела фатална повреда од која починал на лице место. Во моментот на несреќата со него била и неговата сопруга, која кога видела што се случило се онесвестила од шокот. Соседите притрчале да помогнат и повикале Итна помош, но лекарите утврдиле дека човекот починал, како последица од влезно-излезната рана на стомакот предизвикана од убодот на столбот.  

 Очевидци на настанот потресени кажуваат дека тоа што вчера се случувало пред нивните очи било како во сцена од хорор филм. Починатиот не можеле да го извадат од шипката, поради што морале да ја сечат со бонсек, додека неговото тело било облеано во крв.

Човекот беше качен на оревот и одеднаш една жена почна да плаче и да бара помош. Отидивме и имаше што да видими. Страшно... страшна смрт, не сакам да се потсетувам. Неможеше никој да му помогне. Едвај го извадија од шипката. Во шок сум од вчера, сите се потресовме - кажува еден сосед.

Увид на лице место извршили полициско- судски екипи, при што било утврдено дека се работи за несреќен случај и телото на починатиот е предадено на семејството.