Постдипломци од Јапонија во студиска посета во „Еуро колеџ“

Нацуко Томатани, Коџи Вада и Ли Зихен, за првпат доаѓаат во Македонија и Куманово, и презадоволни се од престојот и пречекот на домаќините.

Нивниот универзитет е рангиран меѓу стоте најдобри во светот.

Љубиша Петрушевски, декан на Еуро Колеџот од Куманово,  вели  дека со Универзитет „Хокаидо” соработката ја започнале во 2014 година, а во изминатите години таа е интензивирана и надоградена.

- Денес соработката со колегите од „Хокаидо” се одвива на повеќе нивоа, гостувања на јапонски предавачи овде и на професори од Еуро колеџ во Куманово, а во план е и размена на академски персонал и на студенти. Како колеџ сме заинтересирани да стипендираме слични двонеделни посети на свои студенти во Хокаидо, каде што ќе можат да слушаат настава и да посетуваат разни компании за практична настава за да стекнат нови знаења и вештини, нешто што дел од студентите веќе го добиваат со студиските посети во другите земји, - вели Петрушевски.

При воспоставувањето на соработка со престижниот универзитет им помогнале од јапонската амбасада.

Студентите од Универзитетот „Хокаидо” се во 14-дневна посета на Македонија, при што ќе посетат приватни и државни компании, министерства и општини, а ќе присуствуваат и на предавања во рамките на истражувачката работа и заради унапредување на знаењето. Вчера имаа средба со претставници од Советот на Општина Куманово.